إنفصام في الوطن

الشعب ألي عمل ثورة في يوم من أيام الشتا القارس قاعد يعمل في ثورة كل ليلة من ليالي الصيف المزفطر .

ما عناش، ما في حالناش، رانا مزمرين، أعملونا، ديرولنا : هذا اش تسمع كل ما  تحل تلفزة ولا إذاعة ولا حتى الشباك .

كان فما مواطن شاف سوق ولا مرشي فارغ يجي يحاججني

. تقوم الصباح تدز برشة مواطنين ماشين يخدموا وإنت مروح ترى برشة مواطنين خارجين يسهروا.

كل ليلة 25 عرس فوق السطح و- 14 باش مسكرين به الزناقي ومفما حتى صالة أفراح تنش في ألذباًن - مانيش انبر ربي يزيدهم -

الصايغية مازالوا ماعملوش إعتصام : لاهين  يخدموا بكل بساطة. الغرام يغلى والمواطن يهون ومن كل الطبقات زادة .

وقت ألي بن علي مازال يركح في دبشو في جدة برشة مواطنين تصب في الدالة .

تعمل دورة في كل تركينة من هذا الوطن الحبيب تو تسمع كل اللهجات مما يوحي أنهم جاو من كل حدب وصوب . الله غالب كان جا فما إستقرار أمني رهو جاو من كل فج عميق .

نشطحو للي العرق يبدا شرتلة، نسهرو ،نكورو، نبحرو، نخرجو، نقطعو نريشو، نفيزو، نصرفو  وكي نفيقو نعطيوها تنهيدة : صاحبي البلاد داخلة في حيط.

فبحيث عنا 12 مليون حيط والحيوط ميزيش كنتول زيد مرضى بإنفصام في الوطن .

الدورة هاذي عملتها باش نوصل حاجة : ساهل برشة باش ننقد الحكومة والمعارضة وأي واحد يمد وجهو في التلفزة . لكن نحب ننقد ألي مادين وجوهم في  الطريق : احنا أيها الشعب العظيم .

ألي ناقمين عليهم في السلطة ولا المعارضة تصويرتكم المشومة في المرايا.

لن يغير الله مابقوم حتى .....

سلام حومة